Աջակցեք Հրանտ Մաթևոսյան կենտրոնին

Մեր գործունեության առաջնային նպատակը մեծ գրողի գրական ժառանգության պահպանումը, ուսումնասիրությունն ու հանրահռչակումն է, նրա ստեղծագործական աշխարհի ներկայացումը նոր սերունդներին և միջազգային հանրությանը։

Մեր կարևորագույն նպատակներից է նաև Ահնիձորում Հրանտ Մաթևոսյանի տուն-թանգարանի կայացումն ու պահպանումը, գրողի հայրենի գյուղի մշակութային կյանքի աշխուժացումը և Ահնիձորի՝ որպես գրական ու մշակութային նշանակալի վայրի զարգացումը։

Ձեր աջակցությամբ կարող են կյանքի կոչվել Մաթևոսյանի ժառանգությանը նվիրված հետազոտական, հրատարակչական, թարգմանական և թվայնացման ծրագրեր, գրական, թատերական, կինեմատոգրաֆիական, ցուցադրական ու կրթական նախագծեր, մանկապատանեկան ստեղծագործական նախաձեռնություններ։

Աջակցել Մշակութային կենտրոնին՝ նշանակում է մասնակից դառնալ մի գործի, որի հիմքում մշակութային հիշողության պահպանումն է, ստեղծագործական մտքի զարգացումը և կրթությունը մշակույթի միջոցով։

Մենք հրավիրում ենք անհատներին, կազմակերպություններին, հիմնադրամներին և գործարար համայնքի ներկայացուցիչներին՝ դառնալու մեր գործընկերներն ու աջակիցները։

Աջակցե՛ք Հրանտ Մաթևոսյան մշակութային կենտրոնին։ Ձեր ֆինանսական, նյութական կամ մասնագիտական ներդրումը կարող է նպաստել մեր ծրագրերի իրականացմանը, գրողի ժառանգության պահպանմանը և Ահնիձորի տուն-թանգարանի զարգացմանը։

Կապվե՛ք մեզ հետ՝ քննարկելու համագործակցության և աջակցության հնարավորությունները։