.... Գլխաբաց շքերթի ելած մեր անբարո իրականությունը պետք է գրողի քո այրական իր պատասխանը ստանա: Գրոտեսկայնորեն դաժան իրականությունը քեզանից տղամարդ մարդու պատասխան է պահանջում - որ ես, ահա, ձեզ ճանաչում եմ: Որ ես կսմիթով, այլասացությամբ յոլա չեմ գնա: Ճի՛շտ, կոպի՛տ, ճշգրի՛տ, շիտակ պիտի լինես՝ այնքա՛ն, ինչքան իր ժամանակին Չարենցը եղավ:
.... Հետո թռած եկավ արեգակի շեղբը, բախվեց, սայթաքեց Արարատի սառույցների վրա և ձորն ընկավ ու փշրվեց, և Արարատյան հովիտը լցվեց կապույտ վաղորդայնով: Մի պահ սպասեց ու հազար գործարանի ուժով պայթեց Երևան միլիոնանոց քաղաքը: Ջրհեղեղը ցամաքել էր՝ Գեղամա լեռներում թողնելով մի բուռ ջուր:
.... Երկրները առհասարակ պարտվում են իդեոլոգիաների պարտությունից հետո, մշակույթների պարտությունից հետո, երկրները, պետությունները զոր ու զորքով գրոհում են, իհարկե, մշակույթների նախնական գրոհումներից հետո։
.... Իրականությունն արդեն ունի ընդհանրացման օրենքը։ Այդ օրենքն ունի առավել ևս գրողական իրականությունը. «Կռունկ» երգի հեղինակը չի չափել այսքան ու այսքան պանդուխտների կարոտները և ստացել նրանց համար կարոտների «Կռունկ» քանորդը. «Կռունկ» երգի հեղինակը չափել է ի՛ր կարոտը, որ կարոտն է աշխարհի բոլոր պանդուխտների։
.... Ասում են, երբ հոտի գլուխը շրջում են՝ կաղ ոչխարներն առաջ են ընկնում. մեր գրականությունը աշխարհի գրականությանը համընթաց է քայլում ո՛չ այդպես...
«Հրանտ Մաթեւոսյան» մշակութային բարեգործական հիմնադրամ
Հիմնադրամի նպատակների իրագործման ելակետը մշակույթն է (Բանը), իր գաղփարախոսական, հայեցակարգային ընկալմամբ։ Այս համատեքստում Հիմնադրամի նպատակներն են.
Հրանտ Մաթեւոսյանի մշակութային, հասարակական ժառանգության ուսումնասիրությունը, հրապարակումը, տարածումը, միջազգայնացումը.
Հրանտ Մաթեւոսյանի հիշատակի հավուր պատշաճի հավերժացումը՝ տուն - թանգարան - հուշահամալրի, նրա անունը կրող հաստատության ստեղծում, անվանակոչություններ եւ այլն.
-այ մշակույթի ճյուղերի՝ գրականություն, կինո, երաժշտություն, կերպարվեստ եւ այլն, խրախուսումը, տարածումը, միջազգայնացումը.
կրթություն - առաջնահերթորեն՝ (միջնակարգ եւ բարձրագույն) մշակութային, հումանիտար ոլորտների խրախուսումը, ծրագրերի իրականացումը։ Քննարկելի են էկոլոգիայի, բնական գիտությունների, այլ ոլորտներում կրթական ծրագրերը.
Շրջակա միջավայր -տեսական եւ գործնական նախագծերի մշակումը, խրախուսումը, իրականացումը.
Գիտություն - տեսական եւ գործնական նախագծերի մշակումը, խրախուսումը, իրականացումը։ Առաջնահերթ են հումանիտար գիտությունները, հատկապես՝ գրականա - լեզվագիտական, ապա նաեւ՝ հումանիտար այլ ճյուղերը, բնական գիտությունները։
Ելակետ ունենալով Հրանտ Մաթեւոսյանի անձի, ժառանգության բացառիկ արժեքի գիտակցումը, Հիմնադրամի գործունեության առարկան, մշակույթը, որպես գաղափարախոսություն, աշխարհայացք ընկալող հասարակական գիտակցության ձեւավորումը, այս հայեցակարգի հանդեպ պետական հատուկ հոգածության ապահովումն է։
Հիմնադրամն իրականացնում է հետեւյալ գործունեության տեսակները.
մշակույթային, բնապահպանական ծրագրեր.
գիտական և կրթական ծրագրեր.
հեռուստա- եւ ֆիլմարտադրություն.
հրատարակչական գործունեություն և ցուցահանդես-վաճառքներ.
մասնակցություն պետական ծրագրերի իրականացմանը, իր կանոնադրական խնդիրների շրջանակներում.
բարեգործություն.
ՀՀ-ում հիմնադրամների համար չարգելված և իր նպատակներից բխող այլ գործունեություն:
Իր նպատակների և խնդիրների իրականացման համար Հիմնադրամը համագործակցում է պետական և տեղական ինքնակառավարման մարմինների, տեղական և օտարերկրյա այլ կազմակերպությունների հետ:
